By Lou Ellen Antonio

ILIGAN CITY (PIA)-- Gi-inspeksiyon sa Local Price Coordinating Council (LPCC) ang mga water refilling station dinhi sa dakbayan.

Gihimo kini ubos sa pagpanguna sa mga sanitary inspectors sa City Health Office (CHO), kauban ang Permits and Licenses Division sa local governmen unit, Department of Trade and Industry, Bureau of Fire Protection, City Information Office ug Philippine Information Agency.

Sumala sa chief sanitation inspector sa syudad nga si Evan Lagura, kinahanglang masiguro nga ang mga water refilling station sa siyudad nakatuman sa mga rekisitos.

"Importante na masiguro nato sa tanang lumulupyo sa Iligan na safe ang ginainom na tubig," mato ni Lagura.

Sa 95 ka water refilling stations nga na-inspeksyon, migula nga 68 lang ang adunay updated nga binulang bacteriological test, 44 ang adunay physical-chemical test, 35 ang adunay sanitary permit ug 49 ang adunay gikapresentang health card sa ilang mga empleyado.

Nasayran sab nga kadaghanan sa mga water refilling stations sa syudad, wala nagatuman sa pagsul-ob og personal protective equipment (PPE) sama sa apron, rubber boots, hand gloves, hairnet ug face mask.

Busa nanawagan si Lagura sa mga tag-iya sa water refilling stations na i-comply ang mga rekisitos.

"Sa atong partner mga water refilling station, among panawagan sa tanang tag-iya ang inyo gyud religiously sa pagcomply sa inyong lab result every month na bacteriological test ug 6 months sa physical ug chemical test. Kay kinahanglan kaayo. Dili gusto mahitabo ang mga sakit-sakit. See to it na safe jud ang tubig na i-serve sa client," matod ni Lagura.

Gimando sab sa CHO kanila sa pag-adto sa ilang buhatan ug sa pagkumpleto sa tanan nga mga rekisitos aron malikayan ang posibleng silot o penalties. (LELA/ PIA Lanao del Norte)