By Lou Ellen Antonio

ILIGAN CITY (PIA) – Kapin usa ka libo nga trabaho ang gihanyag sulod sa duha ka adlaw nga Career and Job Fair nga gipahigayon sa Alumni and Career Center sa Mindanao State University –Iligan Institute of Technology (MSU-IIT) ug  sa Public Employment Service Office.

Miabot sa 16 ka employers sa pribadong sektor ang niapil sa maong Job Fair. 

In-demand nga trabaho ang  customer service representative, staff nurse, esl teacher, conductor, driver, under chassis mechanic, ug technical support representative.

"Itong job fair ito ay isa sa ating programa sa tinuod nga pagtabang sa atong graduate na dili lang ang among responsibilidad kay kanang human makahauman sila sa ilang eskwelahan. I think ang pinaka importante is makit-an jud nila ang ilang ultimate job,” sumala ni MSU-IIT Chancellor Alizedney Ditucalan.

Busa dako ang pasalamat ni Albert Araco, usa ka graduating student sa Bachelor of Science in Hospitality Management sa maong oportunidad nga gihatag kanila.

"Thankful kaayo ko sa ilaha tungod aning mas mapadali bitaw. Dili mi mahasol na muadto mismo sa mga employers ug mas napadool siya ug mas nagdali,” sumala ni Araco.

Hinuon dili lang alang sa graduating students ang Job Fair sanglit giablihan sab kini sa  alumni ug uban pang nangita og trabaho.

Ang Job Fair kabahin sab sa employment facilitation activities sa Department of Labor and Employment. (LELA/PIA-10-Lanao del Norte)